ភ្ញៀវទេសចរណ៍នៅលើកប៉ាល់ Westerdam ចំនួន២០នាក់ មានបញ្ហាសុខភាពបន្តិចបន្តួចពាក់ព័ន្ធនឹងក្រពះ ពោះវៀន និងរាករូសជាដើម មិនមានរោគសញ្ញាវីរុសកូរ៉ូណានោះទេ

ខេត្តព្រះសីហនុ ៖ ភ្ញៀវទេសចរណ៍ចំនួន២០នាក់ នៅលើកប៉ាល់ West​e​r​dam ក្នុងចំណោមជាង២០០០នាក់ ត្រូវបានអាជ្ញាធរអះ​អា​​​ងថា មានបញ្ហាសុខភាពបន្ដិចបន្ដួច ដូ​ច​ជាក្រពះ ពោះវៀន និងរាករូសជាដើម គឺមិនមានរោគសញ្ញាវីរុសកូរ៉ូណាថ្មីនោះទេ ។ទោះ​​​បីជាយ៉ាងនេះក្ដី និងដើម្បីឲ្យដឹងច្បាស់នោះ កំហាករបស់ពួកគេ ត្រូវបានមន្ដ្រីសុ​ខា​ភិបាល និងមន្ដ្រីអង្គការសុខាពិភ​ពលោ​ក​ (WHO) យកទៅធ្វើតេស្ដទៅវិទ្យាស្ថានប៉ា​ស្ទ័​​​រ រាជធានីភ្នំពេញ ដោយតាមឧទ្ធម្ភាគចក្រភ្លាមៗ នៅវេលាថ្ងៃត្រង់ទី១៣ ខែកុម្ភៈ ឆ្នាំ​​​​​​២​០២០នេះ ។

តាមការបញ្ជាក់ពីអ្នកគ្រប់គ្រងកប៉ាល់ និងមន្ដ្រីសុខាភិបាល ដែលបានចុះទៅពិនិត្យជាក់ស្ដែងទៅលើភ្ញៀវទេសចរណ៍ និងអ្នក​ប​ម្រើការងារនៅលើកប៉ាល់ទាំងជាង២០០​០​នា​ក់ បានបង្ហាញថា មានតែមនុស្សប្រមាណ ២០នាក់ប៉ុណ្ណោះ ដែលមានបញ្ហាសុខ​ភា​ពបន្ដិចបន្ដួច តែពាក់ព័ន្ធនឹងបញ្ហាក្រពះ ពោះវៀន និងរាករូសជាដើម មិនពាក់ព័ន្ធមេរោគកូរ៉ូណាថ្មីនោះទេ ។

បើទោះជាបែបនេះក្ដី តាមការបញ្ជាក់ពីមន្រ្តីដដែលនេះ កំហាករបស់ពួកគេក៏ត្រូវបានដឹកយកទៅធ្វើតេស្ដនៅវិទ្យាស្ថានប៉ាស្ទ័រភ្លា​មៗ ដើម្បីបញ្ជាក់ពីលទ្ធផលពិតប្រាកដ ។ ជា​មួយគ្នានេះ មន្រ្តីជាន់ខ្ពស់ក៏បានប្រកាសអំពាវនាវ និងច្រានចោលព័ត៌មាន ឬក៏​ប​ណ្ដាញសង្គមមួយចំនួន ដែលដាក់ការសង្ស័យទៅលើវីរុសកូរ៉ូណា កើតមានលើក្រុមភ្ញៀវទេ​សចរណ៍ខ្លះ នាំឲ្យមានការយល់ច្រឡំ និ​ង​ចលាចលដល់សង្គម ។ជាមួយគ្នានេះភ្ញៀវទេសចរទាំង២០នាក់ ក៏ត្រូវបានក្រុមមន្រ្តី ដាក់ឲ្យស្ថិតនៅបន្ទប់ដាច់ដោយឡែកនៅ​លើ​​កប៉ាល់ផងដែរ ។

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានអនុញ្ញាតឲ្យនាវាទេសចរណ៍ខ្នាតយក្សដែលមានម្ចាស់ជា ជន​ជា​តិ​ហូ​ឡ​​​ង់កាត់អាមេរិក និងមានមូលដ្ឋាននៅសហ​រ​ដ្ឋអាមេរិក ចូលសំចតនៅកំពង់ផែខេត្តព្រះសីហនុរបស់កម្ពុជា ក្រោយពីប្រទេស និ​ង​កោះសរុបចំនួន៦ បដិសេធមិនឲ្យនាវាដ៏ធំមួយ នេះចូលចត ដោយសារភ័យខ្លាចអ្នកដំ​ណើរមានផ្ទុកវីរុសកូរ៉ូណាថ្មី។ ការអ​នុ​ញ្ញ​ត​ឱ្យនាវានេះចូលពីសំណាក់សម្តេចតេជោ ហ៊ុន សែន គឺបង្ហាញពីការលុបបំបាត់នូវជំងឺភ័យខ្លាច ដែលកំពុងកើតមាននៅលើ​ពិ​ភព​លោ​ក ។ សម្តេចតេជោបន្ថែមថា កម្ពុជាគ្មានឡើយការរើសអើងពូជសាសន៍ ត្រូវតែចូលរួមសង្រ្គោះក្នុងកិច្ចការមនុស្សធម៌ ខ​ណៈអ្នកទេសចរលើនាវាកំពុងជួបគ្រោះអាសន្ន ។

ការអនុញ្ញាតឲ្យចូលចតនេះធ្វើឡើង បន្ទាប់ពីមានការធានាច្បាស់លាស់ពីអ្នកគ្រប់គ្រងនាវាទេសចរណ៍ Westerdam ថា មនុស្សទាំង​អស់លើកប៉ាល់ មិនមានអ្នកណាម្នាក់ ផ្ទុ​កវីរុសកូរ៉ូណាថ្មី ឬ Covid-19 នោះទេ ៕