ពិធីប្រកាសចូលកាត់មុខតំណែងអភិបាលរង នៃគណ:អភិបាលខេត្តកោះកុង ក្រោមធិបតីភាពដ៏ខ្ពង់ខ្ពស់ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃអញ្ជើញជាធិបតី ប្រកាសតែងតាំង លោកឈិត រតនៈ ជាអភិបាលរងខេត្តកោះកុង។
ខេត្តកោះកុង÷ឯកឧត្តម ប៊ុន ហុន រដ្ឋលេខាធិការក្រសួង មហាផ្ទៃ បានអញ្ជើញជាអធិបតីដ៍ខ្ពង់ខ្ពស់ ក្នុងពិធីប្រកាសតែងតាំងលោក ឈិត រតនៈ ចូលកាន់តំណែងជា អភិបាលរងនៃគណៈអភិបាលខេត្តកោះកុង នៅព្រឹកថ្ងៃទី២៥ ខែកក្កដា ឆ្នាំ២០២៤ នេះ ដែលប្រារពធ្វើឡើងនៅសាលមហោស្រពខេត្តកោះកុង នាឱកាសនោះដែរ លោកជំទាវ មិថុនា ភូថង អភិបាលនៃគណៈអភិបាលខេត្តកោះកុង បានលើកឡើងអំពីទីតាំងភូមិសាស្ត្រនៃខេត្តកោះកុង ស្ថានភាពសេដ្ឋកិច្ចប្រជាជន សក្ដានុពលរបស់ខេត្ត សន្តិសុខសណ្ដាប់ធ្នាប់និងការអនុវត្តន៍ការងារប្រចាំថ្ងៃរបស់ខេត្តជូនអង្គពិធីជ្រាប លោកជំទាវ អភិបាលខេត្តបានបញ្ជាក់ថា÷
គណៈអភិបាលខេត្ត បានធ្វើការណែនាំតម្រង់ទិសជាប្រចាំដល់មន្ត្រីរាជការ ឱ្យយកចិត្ត ទុកដាក់បំពេញការងារស្របតាមច្បាប់ លិខិតបទដ្ឋានគតិយុត្តនានាដែលមានចែងជាធរមាន និងបំពេញ តួនាទី ភារកិច្ច ស្របតាមលក្ខ័ណ្ឌការងាររបស់ខ្លួនម្នាក់ៗ សំដៅធានាបាននូវការផ្តល់សេវាសាធារណៈ ជូនប្រជាពលរដ្ឋប្រកដោយប្រសិទ្ធភាព ដោយឡែកការផ្តល់សេវារដ្ឋបាលនៅថ្នាក់ក្រោមជាតិ តាមរយៈ ការជួយគាំទ្រឧបត្ថម្ភ ពី រាជរដ្ឋាភិបាល ជាពិសេសក្រសួងមហាផ្ទៃ អង្គភាពច្រកចេញចូលតែមួយសាលាខេត្ត ការិយាល័យ ច្រកចេញចូលតែមួយ ក្រុង ស្រុក បាននិងកំពុងដំណើរការផ្តល់សេវារដ្ឋបាល និងសេវាសាធារណៈ ជូនប្រជាពលរដ្ឋប្រកបដោយគុណភាព តម្លាភាព ប្រសិទ្ធភាព និងឆ្លើយតបទាន់ពេលវេលាទៅនឹងតម្រូវ ការរបស់ប្រជាពលរដ្ឋមូលដ្ឋានបានយ៉ាងល្អប្រសើរ និងទទួលបានការគាំទ្រពីសំណាក់ប្រជាពលរដ្ឋនៅ មូលដ្ឋាន ឆ្លៀតក្នុងឱកាសនោះ លោកជំទាវ អភិបាលខេត្ត សម្ដែងការអបអរសាទរ ចំពោះ លោក ឈិត រតនៈ អភិបាលរងខេត្តថ្មីដែលទើបតែងតាំង នៅពេលនេះផងដែរ ។
មានប្រសាសន៍ក្នុងពិធី ឯកឧត្តម ប៊ុន ហុនរដ្ឋលេខាធិកាក្រសួងមហាផ្ទៃ បានផ្តាំផ្ញើរ ដល់ លោក អភិបាលរងខេត្តថ្មី ដែលទើបប្រកាសចូលកាន់មុខតំណែង នាពេលនេះ ត្រូវបន្តប្រពៃណីល្អ ក្នុងការចូលរួមសហការ ដឹកនាំ គ្រប់គ្រង ចាត់ចែង និងអនុវត្តតួនាទី ភារកិច្ចរបស់ខ្លួនឲ្យស្របតាមច្បាប់ និងលិខិតបទដ្ឋាននានា ដែលរាជរដ្ឋាភិបាលកម្ពុជា អាណត្តិទី៧ បានដាក់ចេញ ជាបន្តបន្ទាប់ និងខិតខំចូលរួមបម្រើប្រជាពលរដ្ឋឱ្យកាន់តែល្អប្រសើរ ។
បន្ទាប់ពីបានប្រកាស់ចូលកាន់តំណែងជា អភិបាលរងនៃគណៈអភិបាលខេត្តកោះកុងរួច
លោក ឈិត រតនៈ បានធ្វើការប្តេជ្ញាចិត្តថា÷
ប្តេជ្ញាការពារគុណតម្លៃ សន្តិភាព និងស្ថេរភាព នយោបាយ ដោយខិតខំអនុវត្តឱ្យ បានម៉ឺងម៉ាត់នូវរដ្ឋធម្មនុញ្ញ ច្បាប់ លិខិតបទដ្ឋានគត្តិយុត្តិជាធរមាន និងគោលការណ៍ណែនាំនានា របស់រាជរដ្ឋាភិបាល ដែលបានដាក់ចេញ ឱ្យមានប្រសិទ្ធភាពខ្ពស់ប្តេជ្ញាគោរពគាំទ្រ និងអនុវត្តឱ្យបានខ្ជាប់ខ្ជួននូវ
កម្មវិធី នយោបាយ និងយុទ្ធសាស្ត្របញ្ជាចតុកោណដំណាក់កាលទី១ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ខិតខំគោរព និងអនុវត្តតាមគោលការណ៍ដឹកនាំចង្អុលបង្ហាញ និងរបស់ថ្នាក់ដឹកនាំក្រសួង មហាផ្ទៃ ឯកឧត្តម ប្រធានក្រុមប្រឹក្សាខេត្តកោះកុង លោកជំទាវ អភិបាលនៃគណៈអភិបាលខេត្ត កោះកុង ក៏ដូចជាថ្នាក់ដឹកនាំក្រសួង ស្ថាប័ននានាឱ្យបានល្អ ដើម្បីចូលរួមពង្រឹងការគ្រប់គ្រង និង ដឹកនាំប្រកបដោយប្រសិទ្ធភាព តម្លាភាព គណនេយ្យភាពក្នុងការបំពេញភារកិច្ចនៅរដ្ឋបាលថ្នាក់ក្រោមជាតិ ។
ចូលរួមទប់ស្កាត់ លុបបំបាត់រាល់បាតុភាពអសកម្មនានា រួមចំណែកលើកកំពស់ជីវភាពរស់នៅសុខមាលភាព ការកាត់បន្ថយភាពក្រីក្រ របស់ប្រជាជន ស្របតាមគោលនយោបាយ របស់រាជរដ្ឋាភិបាលចូលរួមរៀបចំកសាង និងអភិវឌ្ឍន៍លើវិស័យនានាក្នុងខេត្ត ពិសេសការរៀបចំកែលំអរ សោភ័ណភាព ទីក្រុង និងទីប្រជុំជន ធានាឱ្យបាននូវបរិស្ថានល្អ ប្រកបដោយសក្តានុពលសេដ្ឋកិច្ច សង្គម លើកស្ទួយជីវភាពរស់នៅប្រកបដោយវិបុលភាព ផាសុខភាព សុខមាលភាពជូនពលរដ្ឋ ចូលរួមជំរុញការអនុវត្តគោលនយោបាយ ភូមិ-ឃុំ មានសុវត្ថិភាព ឱ្យកាន់តែមានប្រសិទ្ធភាពខ្ពស់ ដើម្បីបន្តរក្សាសន្តិសុខ សណ្តាប់ធ្នាប់សង្គម រក្សាស្ថេរភាពនយោបាយ និងភាពសុខដុមនីយកម្ម យកចិត្តទុកដាក់ អនុវត្តការងារកំណែទម្រង់ វិមជ្ឈការ និងវិសហមជ្ឈការ ស្របតាមកម្មវិធីជាតិ។
សាមគ្គីភាពផ្ទៃក្នុង ជួរគណៈអភិបាល បង្កើតទំនាក់ទំនងល្អជាមួយ ក្រុមប្រឹក្សា រួមទាំងក្រសួង ស្ថាប័ន រដ្ឋបាលក្រុង ស្រុក មន្ទីរ អង្គភាព រដ្ឋបាលឃុំ សង្កាត់ អង្គការ សមាគម ដៃគូរអភិវឌ្ឍ និងវិស័យឯកជន និងលើកកំពស់សមត្ថភាពមន្ត្រីរាជការស៊ីវិល មន្ត្រី ជំនាញ កងកំលាំងប្រដាប់អាវុធ ដើម្បីធានាឱ្យការអនុវត្តការងាររបស់រដ្ឋបាលខេត្ត មានភាពរលូន ។ ចូលរួមដឹកនាំដឹកនាំមន្ត្រីរាជការ មន្ត្រីជំនាញ ដើម្បីធ្វើការអភិវឌ្ឍមូលដ្ឋាន និងបម្រើសេវាសាធារណៈ
ជូនបងប្អូនប្រជាពលរដ្ឋឱ្យបានល្អប្រសើរ {នាយកនិពន្ធប្រចាំខេត្តកោះកុង }។
