អភិបាលខេត្តត្បូងឃ្មុំ បញ្ចុះបឋមសិលាសាងសង់ ឧបដ្ឋានសាលាថ្មី ក្នុងវត្តសិបណយារាម (ហៅវត្តចំបក់) នៅស្រុកមេមត់ ដើម្បីបន្តអភិវឌ្ឍន៍ និងអភិរក្សវិស័យពុទ្ធចក្រ
(ត្បូងឃ្មុំ)៖ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ នៅថ្ងៃទី៣០ ខែមីនា ឆ្នាំ២០២៤ បានអញ្ជើញជាអធិបតីភាពក្នុងពិធីបុណ្យបញ្ចុះបឋមសិលាសាងសង់ ឧបដ្ឋានសាលាថ្មី ស្ថិតនៅឃុំរូង ស្រុកមេមត់ ខេត្តត្បូងឃ្មុំ។
ក្នុងនោះមានការអញ្ជើញចូលរួមពីសំណាក់ អភិបាលរងខេត្ត ថ្នាក់ដឹកនាំសាលខេត្ត មន្ទីរ-អង្គភាពជុំវិញខេត្ត អាជ្ញាធរស្រុកមេមត់ សិស្សានុសិស្ស យុវជន ព្រមទាំងបងប្អូនប្រជាពលរដ្ឋ ពុទ្ធបរិស័ទចំណុះជើងវត្តយ៉ាងច្រើកុះករ។
នាឱកាសនោះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត ថ្លែងប្រាប់លោកតាលោកយាយឲ្យដឹងថា កម្ពុជាមានសុខសន្តិភាព និងការអភិវឌ្ឍន៍ ដែលយើងទទួលបានសព្វថ្ងៃនេះ ប្រសូត្រចេញក្រោមការដឹកនាំពីសំណាក់សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តអភិវឌ្ឍន៍
ទាំងវិស័យពុទ្ធចក្រ និងអាណាចក្រ ជាពិសេសនឹងឈានឆ្ពោះទៅកាន់ប្រទេសអ្នកមាន តាមការគ្រោងទុក នៅឆ្នាំ២០៥០ខាងមុខនេះ ក្រោមការដឹកនាំដ៏ឈ្លាសវៃបន្តពីសំណាក់ សម្តេចធិបតី ហ៊ុន ម៉ាណែត នាយករដ្ឋមន្ត្រី អាណត្តិថ្មីនេះ។
ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត គូសបញ្ជាក់ថា កត្តាសុខសន្តិភាព អភិវឌ្ឍន៍ទាំងវិស័យពុទ្ធចក្រ និងអណាចក្រនេះហើយ ដែលនាំឲ្យកម្ពុជាមានការរីកចម្រើន និងបន្តអភិវឌ្ឍន៍ ជាក់ស្តែងសមិទ្ធិផលជាច្រើនបានក៏សាងឡើង និងបន្តកសាងក្នុងទីអារាមវត្តសិបណយារាម (ហៅវត្តចំបក់) ដូច្នេះយើងទាំងអស់គ្នា ត្រូវរក្សាសន្តិភាពនេះឲ្យបានគង់វង្ស។
ជាមួយគ្នានោះ ឯកឧត្តមបណ្ឌិត ជាម ច័ន្ទសោភ័ណ ក៏មិនភ្លេចរំលឹកជាថ្មីពាក់ព័ន្ធ ពាក់ព័ន្ធករណី ល្បែងសុីសងខុសច្បាប់ ល្បែងជល់មាន់ ក្មេងទំនើង បទល្មើសនានា ជាពិសេសបញ្ហាគ្រឿងញៀន ដាច់ខាតបង្ក្រាបឲ្យខានតែបាន។
ឯកឧត្តមបណ្ឌិត អភិបាលខេត្ត សង្កត់ធ្ងន់ថា បទល្មើសខាងលើទាំងនេះ គឺបង្កអសន្តិសុខ និងប៉ះពាល់យ៉ាងខ្លាំងដល់សណ្តាប់ធ្នាប់សាធារណៈ បើសិននៅបន្តមាន ក្នុងមូលដ្ឋានស្រុកមេមត់នោះ អភិបាលស្រុក អធិការនគរបាលស្រុក មេបញ្ជាការអាវុធហត្ថស្រុក មេឃុំ មេភូមិ មេប៉ុស្តិ៍នគរបាល អាជ្ញាធរពាក់ព័ន្ធទាំងអស់ត្រូវទទួលខុសត្រូវ តាមឋានានុក្រម ដល់ពេលត្រូវវះកាត់ គ្មានការលើកលែងទៀតនោះឡើយ។
ដោយសទ្ធាជ្រះថ្លា ក្នុងវិស័យពុទ្ធសាសនា មិនខុសពីដូចសព្វរាល់ដង នាឱកាសនោះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ បានប្រគេនថវិកាជូនវត្តសិបណយារាម ចំនួន១០លានរៀល ព្រមទាំងចែកជូនថវិកាអ្នកចូលរួម និងចំណាយកម្មវិធីទាំងមូល អស់ថវិកាសរុបប្រមាណ ២៦លានរៀល។
លោក ស្រេង លី អភិបាលស្រុកមេមត់ បានបង្ហាញរបាយការណ៍ ការផ្តួចផ្តើមកសាង និងសមិទ្ធិផលនានា នៅទីអារាមនេះឡើង ជាពិសេសឧបដ្ឋានសាលា ក្នុងវត្តសិបណយារាម ដែលចាប់ផ្ដើមសាងសងនាឱកាសនេះ មានទទឹង២១ម៉ែត្រ បណ្ដោយ៣៣ម៉ែត្រ កម្ពស់១៨ម៉ែត្រ គ្រោងថវិកាសាងសង់ជាង៤២ដុល្លាអាមេរិក ដោយក្នុងនោះ ឯកឧត្តម ជា សុផារ៉ា ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានចូលរួមបច្ច័យចំនួន៥000$ និងឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ ចំនួន១០លានរៀលផងដែរ៕
