មណ្ឌលគិរី៖ អាជ្ញាធរខេត្តមណ្ឌលគិរី បានជម្រុញដល់មន្ទីរពាក់ព័ន្ធ ជាពិសេសមន្ទីរវប្បធម៌ និងវិចិត្រសិល្បៈ ។
ត្រូវធ្វើការ ផ្សព្វផ្សាយឱ្យបានទូលំទូលាយ នូវតម្លៃវប្បធម៌ និងសិល្បៈជាតិដល់មហាជនទូទៅ ជាពិសេសយុវជនគ្រប់ស្រទាប់ទាំងក្នុង និងក្រៅសាលា និងត្រូវរៀបចំកម្មវិធីផ្ទេរចំណេះ ជំនាញ ពីមនុស្សចាស់ មកក្មេងៗជំនាន់ក្រោយ ដើម្បីបន្តវេន និងថែរក្សា ប្រពៃណីឱ្យបានគង់វង្ស និងចងក្រងនូវប្រវត្តិ ប្រពៃណី ទំនៀមទម្លាប់ របស់បងប្អូនជនជាតិដើមភាគតិច។ លោក នួន សារ៉ន អភិបាលខេត្តស្តីទី ថ្លែងបែបនេះ ក្នុងទិវាវប្បធម៌ជាតិ៣មីនា លើកទី២៦ ឆ្នាំ២០២៤ ក្រោមប្រធានបទ យុវជនដើម្បីវប្បធម៌ជាតិ ដែលប្រព្រឹត្តទៅ សាលមហាស្រប នៃមន្ទីរវប្បធម៌ និងវិចិត្រសិល្បៈខេត្តមណ្ឌលគិរី រសៀលថ្ងៃទី២៩ ខែមីនា ឆ្នាំ២០២៤។
ក្នងពិធីនេះ ក៏មានការចូលរួមពីសំណាក់ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត លោក នួន សារ៉ន អភិបាលខេត្តស្តីទី និងមានការចូលរួមពី ព្រឹទ្ធាចារ្យ នាដកីនិម្មិត ណាន សាម័យ មេបញ្ជាការកងកម្លាំងទាំងបី លោក លោកស្រី ប្រធាន អនុប្រធានមន្ទីរ/អង្គភាពជុំវិញខេត្ត លោក លោកស្រីតំណាងអង្គការក្រៅរដ្ឋាភិបាល ព្រមទាំង លោកគ្រូ អ្នកគ្រូ ប្អូនៗសិស្សានុសិស្សជាច្រើនរូប
លោក នួន សារ៉ន អភិបាលខេត្តស្តីទី មានប្រសាសន៍ វិស័យវប្បធម៌ គឺមានតម្លៃណាស់សម្រាប់គ្រប់ជាតិសាសន៍នៅលើពិភពលោកយើងទាំងមូល។ សម្រាប់ព្រះរាជាណាចក្រកម្ពុជា គឺយើងមានវប្បធម៌ដ៏សម្បូរបែប ដែលជាអត្តសញ្ញាណជាតិ រហូតយើង ទទួលបានកិត្តិនាម “កម្ពុជាជាព្រះរាជាណាចក្រ នៃវប្បធម៌” ។ ដោយឡែកសម្រាប់ខេត្តណ្ឌលគិរី ថ្វីត្បិតតែ មិនមានប្រាង្គប្រាសាទ តែយើងមានបេតិកភណ្ឌវប្បធម៌ អរូបី ដែលបន្សល់តៗគ្នា របស់បងប្អូនជនជាតិដើមភាគតិច ជាយូរលង់ណាស់មកហើយ។ ក្នុងនោះរដ្ឋបាលខេត្តបានបង្កើត និងរក្សានូវទីតាំងជាច្រើន សម្រាប់ទុកជាទីកន្លែងគោរពសក្ការបូជា ដែលជាការលើកទឹកចិត្ត និងគាំទ្រនូវតម្លៃវប្បធម៌ របស់បងប្អូនជនជាតិដើមភាគតិច ជាក់ស្តែងរដ្ឋបាលខេត្តបានបង្កើតនូវមជ្ឈមណ្ឌលវប្បធម៌ជនជាតិ ដើមភាគតិចជាច្រើន ដូចជាមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ មជ្ឈមណ្ឌលវប្បធម៌ជនជាតិដើមភាគតិចភ្នំក្រោល មជ្ឈមណ្ឌលវប្បធម៌ជនជាតិដើមភាគតិចភ្នំកែវសីមា មជ្ឈមណ្ឌលវប្បធម៌ជនជាតិដើមភាគតិចភ្នំណាមលៀរ និងទីតាំងបុរាណដ្ឋានជាច្រើនទៀត។ លើសពីនេះទៀត រដ្ឋបាលខេត្ត បានជំរុញ និងលើកទឹកចិត្ត ដល់បណ្តាមន្ទីរ អង្គភាពពាក់ព័ន្ធ ជាពិសេសមន្ទីរវប្បធម៌ និង វិចិត្រសិល្បៈ ត្រូវរៀបចំកម្មវិធីផ្ទេរចំណេះ ជំនាញ ពីមនុស្សចាស់ មកក្មេងៗជំនាន់ក្រោយដើម្បីបន្តវេន និងថែរក្សា ប្រពៃណីឱ្យបានគង់វង្ស និងចងក្រងនូវប្រវត្តិ ប្រពៃណី ទំនៀមទម្លាប់ របស់បងប្អូនជនជាតិដើមភាគតិច ដែលមាននៅក្នុងខេត្តឱ្យបានទាំងអស់ ស្រាវជ្រាវ និងចងក្រងនូវឧបករណ៍ប្រើប្រាស់ ជាពិសេសត្រូវសាងសង់នូវសារមន្ទីរជាតិពន្ធុវិទ្យាមួយ សម្រាប់តម្កល់ ថែរក្សារបស់របរ និង ឧបករណ៍ប្រើប្រាស់ ឧបករណ៍ភ្លេង តន្ត្រី គ្រឿងសក្ការបូជា ដែលជាស្នាដៃរបស់អ្នកជំនាន់មុន ក៏ដូចជាសម័យបច្ចុប្បន្ន។
លោក សី ទូច ប្រធានមន្ទីរវប្បធម៌ និងវិចិត្រសិល្បៈខេត្ត បានឱ្យដឹងថា ក្រុមការងារនៃមន្ទីរវប្បធម៌ បានកំណត់ទីតាំងបេតិកភណ្ឌវប្បធម៌ បានចំនួន៧ទីតាំង និងរៀបចំដំណើការចុះបញ្ជីជាសម្បត្តិ បេតិកភណ្ឌជាតិ- បានស្រង់ស្ថិតិ និងសរសេរព័ត៌មានទាក់ទងនឹង ឧបករណ៍ប្រើប្រាស់ ឧបករណ៍ភ្លេងរបស់បងប្អូន ជនជាតិដើមភាគតិចបានចំនួន១០៥មុខ/របស់ -បានដឹកនាំ និងសម្របសម្រួលដល់ការផ្ទេរ ចំណេះ ជំនាញប្រពៃណី ពីចាស់ទុំ ដល់យុវជនបន្តវេន បានចំនួន២ជំនាញ -បានសិក្សា និងចងក្រងឯកសារ អ្នកមានជំនាញខាងវិស័យវប្បធម៌ និងសិល្បៈបានចំនួន៥០នាក់ សិក្សា និងចងក្រងឯកសារ ប្រវត្តិប្រពៃណីជនជាតិដើមភាគតិចបាន៦ជនជាតិ-បានសិក្សា និងចងក្រងឯកសារ ប្រវត្តិទីតាំងបុរាណដ្ឋានបានចំនួន៤ទីតាំង បានចងក្រងមុខម្ហូបរបស់ជនជាតិដើម ភាគតិចព្នងចំនួន២១មុខ។
